Archivo del Autor: mjosgiron

De Hawai a la Ribagorza

Pa Nadal vam tenir una visita prou especial: John Elliott, de la Universidad de Hawai, estudiante especializau en la conservación y documentación de llenguas.
Vam fer tres sesions de grabación a Estadilla, Graus y Secastilla con hablantes patrimonials. Al principio de las trobadas vam dixar espacio y tiempo ta facilitar la familiarización y distensión, dixán que la conversación marchase sola. Al final de la hora y media que mos vam fijar de media, vam proposar exercicios más dirigius buscán patrons comuns de entonación, expresions de sorpresa, etc.

John é fillo de Winston-Salem, a Carolina del Norte, one se va graduar en Llingüística y Estudios Globals a la Universidad de Chapel Hill l´año 2012.  Va estar dos veranos al programa “Yucatec Maya” a la península de Yucatán (México) y ara treballa en el suyo master de Llingüística orientau a l´estudio de la conservación y documentación de llenguas a la universidat de Hawai.

Esta universidat va posar en marcha un proyecto ta dar visibilidat a las llenguas minorizadas, creán una web on es propios hablantes patrimonials podesen colgar información u documentos reals. Iste empoderamiento del hablante patrimonial é fundamental,  seguntes la experiencia que John ha teniu con llenguas minoritarias. Es casos de éxito en la recuperación de llenguas gosan ser impulsaus dende abaixo, y no pas dende la adminsitración. Bells exemplos d´accions que funcionan a Yucatán mos dan idea d’iste impulso: guarderías de inmersión con cuidadors que charren la llengua, acompañamiento de chen gran con bel grau de dependencia per voluntarios que quieran aprender a charrar, etc.

La visita de John va fer posiblle la trobada con chen que se preocupa y quiere fer cosas per el aragonés, y en particular per el ribagorzano. Él tiene prou fayena con las transcripcions, y tamé guardará las grabacions al archivo digital de la suya escuela. Nusatras seguirem en contacto con toz es que quieran treballar per dignificar y dar visibilidat al ribagorzano, y esperam poder amostrar-tos resultaus ben lluego. No dixez de seguir-mos!

MJ Giron, Secastilla, febrero 2014

Anuncios

Deja un comentario

Archivado bajo Sin categoría

Feliz 2014

Tos felicitam l’año nuevo con este texto que va ganar la edición del concurso “Cientocincuenta” de fa dos años. Un concurso que convoca l´Ayuntamiento de Graus cada adviento dende 2007 pa felicitar l’año nuevo.

Al concurso pueden presentar-se obras en aragonés ribagorzano y en castellano. Gracias a chicoz gestos como este, la producción literaria en la nuestra llengua tiene un puesto más on expresar-se.

Esperam que el disfrutez y que al 2014 trobez la fuerza y la inspiración pa tirar t´abán con es vuestros proyectos, deleras y suenios.

Las casas son pa la chen, y no la chen pa las casas. Se traballa pa vivir, no se vive pa traballar. Cal ser, en cuentas de parecer. Estar-se aquí y ara sin esperar-se al fin de semana, a las vacacions, al año nuevo u a la jubilación.

Aprender pa crecer y crecer aprendén. Respirar con el esmo als pulmons, comer con l´alma al galet, beber con es llabios ubiertos como flloretas al mes de mayo, fumar per gozo y mai per vicio, fer vida olvidán-se de morir, subir y baixar escaleretas sentín la calor a las garras…

Ixa llibertat per la que van perder el suenio es nuestros yayos, fecha de banderas y papels muixaus con sangre, ya no é pas la nuestra. Ara tenim que buscar el puesto pa recllamar la vida que hem perdiu más cerca. Llibertat pa sentir y dar gracias.

4 comentarios

Archivado bajo Sin categoría

‘Deseyos’, un poema de la colección “Bardo que alenta” de Ana Tena Puy.

Deseyos

manetas3

Por tu querría dixar-te

el cielo,

y escoscar-te la tierra

pa que podeses ir a galapatons

sin punchas que cllavar-te.

Querría que trocez d’estrelas

te adornasen la frente,

y de calcero posar-te un aire fuerte

que te fese esllampar

cuan tú querises,

d’one tú querises,

llejos.

Querría que allegase

ya el Reino de los Cielos,

que venise po’l Oeste

como ventolera de puerto,

y fese volar las alas llejos,

que no dixase ni pllumas

ni rasto ponzoñero,

d’ixe ánchel chitau.

Pa que tú

conoixeses nomás que la Vida

qu’al naixer, inocente, tú buscabas,

toz buscabam, y seguim asinas

buscán y tropezán al paso

con verenos,

con l’ascurior de l’alma,

con ixe esmo

encara de reptil depredador

y asesino que mata

con voluntaz sujetas,

con intencions sultadas;

que vive y sobrevive matán

lo que quiere y tamé lo que refusa

con buen instinto

con fulera alma.

Yo t’he trayiu t’aquí,

mia culpa, la mía

facultá de dar la vida

empllea-la.

T’he dau la vida

condenán-te a muerte.

… Si la mia muerte valese

pa que la tuya fuese vida…

L’alma se m’afoga apretada

por no poder coger-ie tú adentro.

Y aquí estás manimenos

(yo he teniu la culpa)

p’adornar-me la vida

p’apllenar vacíos huecos

pa responder a la naturaleza militara

que manda adentro de yo

con bramius primitivos.

Pa in-me fen yo

tú estás aquí.

Y no va pensar pas en tú al conchurar-te.

Pero agora te tiengo y querría,

si podese,

dixar-te el Cielo y escoscar-te la tierra.

Si podese… Y quiero.

Anque baranas millenarias traban el mio ser.

… Querir y no poder pas,

querir quiero y no puedo;

desincusas no son, pos yo tamé me trobo

encara en el camino.

Manimenos te digo

con l’alma en la palabra,

qu’ixa será la mia delera

one me gastaré la vida,

on m’estricallaré el cuerpo.

No rebllaré adeván de lo inútil

del deseyo cereño:

Te dixaré pa tú, un mundo

one los escurzons no tendrán pas

la zaguera palabra que dir

escupín ponzoñosos.

Apretaré la marcha de la evolución,

mudaré el orden de l’historia. Y feré

que boirotas no emporquien el mirallo de la tierra

one se mirará el Cielo, feitos

no a imachen y semellanza a Él,

más ben gemelos.

… No medres aprisa por si acaso,

aguarda,

aguardo unos milenios.

Yo nomás soi yo, cosa p’al caso,

pero con to l’amor que tiengo

lo chuniré con atros, y podré,

Y puedo.

Y en tocar las zagueras

No más ixo:

Bardo de la tierra

y alentada divina.

Bardo bufau que alenta:

Persona.

Que me sé yo….

ben en de debo de ser-ne.

Ana Tena Puy. Bardo que alenta

2 comentarios

Archivado bajo Sin categoría

No rebllez!

Esconchuro per la llengua, de Xavier Tomás

Cuan atras voces esta voz repitan;

la voz de Ribagorza, tan ferida,

que miedos i vergüeñas debilitan,

farem la llengua firme, eixerida.

 

Cuan valentors futuras mos permitan,

fer a la viella llengua, bienvenida,

las voces que aspaciet ara rechitan,

guarda si se ferán buixos de vida!

 

Baluartes d’esta voz ribagorzana,

fortalezas foncense, estadillana:

No dixez amortar-tos la pallabra!

 

No rebllez, buegas soz de Tierra Pllana

one el verbo que muere per galbana,

vivirá como güebra cuan se llabra.

Deja un comentario

Archivado bajo Poesía